Андрей Курбский, князь, (1528 -1583), активный участник взятия Казани

Егда же начата обступати место оное бусурманское, и войско христианское повеленно идти трема полком, через предреченную речку Булак; егда же первие препроводился, направя мостки через нее, преднии полк, а тамо обыкли его звати яртаул, в немже бе войска избраннаго, аки 7000, а над ними стратилаты два, княжа Пронскии Юреи и княжа Феодор Львов, с роду княжат Ярославских, юноши зело храбрые, и прииде им итти с нуждою прямо на оную гору, на Арское поле, между места и Кабана, предреченного озера, от врат градцких аки 2 стреляния лучных; другии же великий полк начаша только препроважатися через оную реку по мостом,— царь же Казанский⁷⁴⁰ выпустил войска конского из места, аки 5000, а пеших до 10 000, на первый предреченный полк, конные Тотаровя с копьи, а пешие со стрелами. И абие удариша посреди полка христианского, аки в полгоры оные, и прерваша его, дондеже поправишася оные стратилатове, бо уже аки со двема тысящами и вяще взошли были на оную гору. И сразишася с ними крепце, и бысть сеча не мала между ими. Потом поспешишася другие стратилати с пешими нашими ручнычними стрельцы и сопроша бусурманов, яко конных, так и пеших, и гониша их биюще аже до самых врат градских, и сколько 10 и живых поимаша. В той же час, вкупе во сражение оное, и стрельбу огненную со града изъявиша, яко со веж высоких⁷⁴¹, так и с стены меские, на войско христианское стреляюще; но ничто же, за Божиею благодатию, тщеты сотвориша

И абие в той день обступихом место и град бусурманскии полки христианскими и отняхом ото всех стран пути и проезды ко граду: не возмогли они никако же ни из града, ни во град преходити. Тоже стратилатове, а по их⁷⁴² воеводы полков, передовыи полк, который ходит у них за яртаулом, прииде на Арское поле, и еще другии полк, в немже бе царь Шигалеи⁷⁴³, и другие великие стратилатове залегоша тамо пути, яже от Нагаиские страны ко граду лежат.

Мне же тогда, со другим моим товарыщем, правый рог, а по их правая рука, поручена была устрояти, аще ми и во младых летех сущу, бо еще мне было тогда лет аки 24 от рождения; но всяко, за благодатию Христа моего, приидох к тому достоинству не туне, но по степенем военным взыдох. И было в нашем полку вящей, нежели 12 000, и пеших стрельцов и казаков аки 6000. И повелено нам итить за Казань реку; и прострошася войско полка нашего аж до Казани реки, яже выше града, а другии конец до мосту, яже по Галицкои дороге⁷⁴⁴, и до тое же реки, яже ниже града; и залегохом пути от всей Луговыя Черемисы⁷⁴⁵, яже ко граду лежат. И случилося нам стояти на месте в равнине, на лугу, между великими олаты⁷⁴⁶; граду же с нашей стороны на превеликой горе стоящу, и сего ради зело нам, паче всех, нужно было от огненныя стрельбы со града, а ззади с лесов от частаго наезжания Черемискаго. Другия же полки сташа между Булаком и Казанию, об сю страну от Волги. Сам же царь с вальным гуфом⁷⁴⁷, або со множеством воев, стал от Казани, аки за версту, або мало больши от града, с приходу своего от Волги, на месте на погористом. И сицевым чином месты и грады бусурманския облегоша. Царь же Казанский затворися во граде, со 30 000 избранных своих воинов⁷⁴⁸ и со всеми карачи⁷⁴⁹ духовными их и мирскими и з двором своим; а другую половину войска оставил вне града на лесех, такоже и те людие, яже Нагаискии улубии прислал на помощь ему, а было их аки 2000 и колько сот⁷⁵⁰. И по трех днях начаша близу места шанцы⁷⁵¹ ставити. Того бусурманы зело возбраниша, ово биюще со града, ово, вытекающе, вручь секошася, и падаху со обою стран множество люду, но обаче вяще бусурманов, нежели християн; и сего ради знак Божия милосердия являшеся Христианом, и дух храбрости нашим прискоряшеся.