"Казанский летописец" о Золотой Орде, Большой Орде и "Царстве Казанском"

Глава   8
О втором начале Казаньском царстве, о прихожении казанского царя
на руския грады, и о взятие во плен великаго князя Василья московьскаго

Поганый же той царь, победив московская войска и обоимав, и обогатися велми, и повоева и поплени Руския пределы. И наполнився всякого добра рускаго до избытка своего, и вознесеся сердцем, и возгордеся умом. И токмо далече ни в кую же Орду не восхоте от предел руских отитти, но прииде на место от места того, с побоища, подале, на другую страну руских предел и украины, бояся великаго князя аще тайно воя пошлет на него боле первых, и граду же ледяному от солнца ростаявшу и крепости ему никакия имуще и на сонных нощию нападут, и от него погинет сам царь и воя его с ним. И шедше полем, перелезе Волгу, и засяде пустую Казань, Саинов юрт. И мало во граде живущих, и начя збиратися в Казань срачини и черемиса, развие по улусом казанским. И ради ему бысть изо оставшихся от плена худыя болгары. И молиша его казанцы быти ему заступника бедам их, и помощника от насилия, всевания рускаго, и быти царьству строителя, да не до конца запустеют, и повинишася ему. Царь же вселися в жилищех их и постави себе древяный град крепок на новом месте, крепчаиша старого, недалече от старыя Казани, разоренныя от руския рати. И начаша збиратися ко царю мнози варвари от различных стран: от Златыя Орды, от Асторохани, и от Азова и от Крыма. И нача изнемогати во время то и Великая Орда усиляти Золотая, и укреплятися вместо Золотыя Орды Казань -новая Орда, запустевший Саинов юрт, кровию рускою кипя. И пройде царьская слава, и честь, и величество з Болшия Орды и с старыя матери ордам всем — на преокаянную дщерь младую Казань. И паки же возрасте царьство, аки древо измерзшее от зимы, оживе, аки солнце огреявше весне. От злаго древа, реку же от Златыя Орды, злая ветвь  произыде - Казань и горкий плод изнесе; и второе зачася от другаго царя ординьскаго.

И тот царь Улуахмет велию воздвиже брань и мятеж в Русской земли, паче всех первых царей казанских, от Саина царя бывших, понежи бе многокознен человек и огнен дерзостию и велик телесем, и силен велми: отвсюду собра к себе воинственную силу и многи грады руския оступи, и всяко им озлобление тяжко наведе. И до самого доиде града Москвы, на другое лето Белевского побоища, июля 3 день пожже около Москвы великия посады, и християнского люду иссече, и во плен сведе. Града же не взя, токмо дань на воя своя взяша, и прочь отиде. И умре в Казани со юншим своим сыном, со Егупом, оба ножем зарезаны от болшаго сына своего Мамотяка, и царьствова на Казани 7 лет. И прият по нем царьство Казанское сын его Мамотяк. От скорпии змии, от лва — лютый зверь, кровопийца же. Се же бысть отца своего злее на крестьяны воевати Руская земля, яко самого великаго князя Василия Васильевича - увы всем тогда, тайно пришед изгоном от Суздаля града, изыма, и вся сущая с ним войско побил в лета 6953, июля в 6 день, и в Казань к себе сведе его. И держа у себе 14 месяц, не в темнице, но проста бе посаждаху его с собою ясти, за единою трапезою си, и не скверниша его поганым своим ядением и питием, и кормляше его чистым брашном руским. И взял на нем окуп велик от велможь его, множество злата и сребра, и отпусти его к Москве на царьство его. Милует бо варварин, видя державнаго зло страждуща...