"Казанский летописец" о Золотой Орде, Большой Орде и "Царстве Казанском"

Глава   4
О первом начале Казанском царстве, и о местном угодье, и о змииском жилище

Бысть же на Каме на реке старый град, именем Брягов, оттуду же прииде царь, именем Саин Болгарский. И поискав по местом проходя в лета 6685 и обрете место на Волге, на самой украине руской, на сей стране Камы реки, концем прилежаху к Болгарской земли, другим же концем к Вятке и к Перме. Место пренарочито и красно велми, и скотопажитно, и пчелисто, и всяцеми земными семяны родимо, и овощми преизобилно, и зверисто, и рыбно, и всякого угодья много, яко не мощно обрести другаго такова места во всей Руской нашей земли нигдеже таковому подобно месту красотою и крепостию и угодием человечским, не вем же, аще есть будет в чюжих землях. И велми царь за то возлюби Саин Болгарьский. И глаголют мнози нецыи, преже место быти издавна гнездо змиево, во всем жителем земля тоя знаемых. Живяше ту возгнездився змий велик и страшен о дву главу: едину имея змиеву, а другую главу волову. Единою пожираше человеки и скоты и звери, а другою главою траву ядяше. А иныя змии около его лежаше, живяху с ним всяцеми образы. Тем же не можаху человецы близ места того миновати, свистания ради змиина и точения их, но далече инем путем обхожаху. Царь же, по многи дни зря места того, обходя и любя его, и не домышляшеся, како извести змия того от гнезда своего, яко да того ради будет град крепок и славен везде. Изыскався в воех его сице волхв хитр и рече царю: «Аз змия уморю и место очищу». Царь же рад бысть и обещася ему царь нечто дати велико, аще тако сотвориши. И собра обояник волшением своим вся живущя  змия те от века в месте том к великому змию во едину грамаду согна и всех чертою очерти, да не излезет из нея ни едина змия, и бесовским действом всех умори. И обволоче кругом сеном и тростием, и дровием, и лозием сухим многим. И полияв серою и смолою, и зажже огнем, и попали, и пожже вся змия, великаго и малыя, яко быти от того велику смраду змиину по всей земли той, и проливающе впредь хотяще быти от окаяннаго царя злое содеяние проклятыя его веры срацынския. Мнозем же от вой его умрети от лютаго смрада змиина. Близ того места стояху кони и верблюды его и мнози падоша. И сим образом очисти место то. Царь возгради на месте том Казань, никому же от державных Руси смеюще супротив что рещи. И есть град Казань, стоит и доныне, всеми рускими людми видим и знаем есть, а не знающими слышим есть. Яко же преже сего на том месте вогнездиси змий лют и токовище их, и воцарися во граде скверный царь, нечестия своего великим гневом наполнився, и распалашеся яко огнь, во ярости на кристияны, и разгарашеся яко огнь, пламенными усты устрашая, и похищая, и поглощая, яко овца, смиренныя люди руския в прележащих всех близ живущая около Казани, изгна от нее русь-тоземца, и 3 лета землю ту пусту положи. И наведе из-за Камы реки язык лют и поган, болгарскую чернь со князи их и со старейшинами и многу ему сущу, ибо подобну суровством и обычаем злым, песьим главам, самоедом. Наполни такими людми землю ту еже ина черемиса, зовемая отяки, тое же глаголют ростовскую чернь, забежавши та от крещения рускаго в болгарских жилищах, и приложи х Казани царь болгарския грады, обладаются царем казанским. То бо бе преже земля болгарець малых за Камою, промеж великая реки Волги и Белыя Волжки до великая Орды Нагайския. А большия болгары на Дунае. Ту же был на Каме старый град, именем Брягов болгарьский, ныне же градище пусто, его же первое взя князь великий Андрей Юревич Владимерский и в конечнее запустение преда, а болгар тех под себе покори. А балыматы от болгар тех яко 20 поприщь. И дале тот же князь великий повоева. И бысть Казань столныи град, вместо Брягова. И вскоре нова орда и земля благоплодна, и семенита, и именита, и медом кипяща, и млеком и дашася во одержание и власть и в наследие поганым. И от сего царя Саина преже зачася Казань, и словяше юрт Саинов. И любяше царь, и часто сам от столнаго своего града Сарая приходяше и живяше в нем. И остави по себе на новом месте, юрте своей, царя от колена своего князя с воиями. По том же царе Саине мнози цари, кровопивцы, руския люди губили, и пременяющеся царьствовав же в Казани лета многа.