Фасил Әхмәтов халык күңелендә мәңгелеккә калды

Кичә Казанның С.Сәйдәшев исемендәге Зур концерт залында композитор, Татарстанның һәм Россиянең атказанган сәнгать эшлеклесе, Россиянең һәм Татарстанның халык артисты Фасил Әхмәтовның (1935-1998) тууына 70 ел тулуга багышланган искә алу кичәсе булды. Концертта җырчылар Зилә Сөнгатуллина, Миңгол Галиев, Клара Хәйретдинова, Эмиль Җәләлетдинов, Георгий Ибушев һәм башкалар катнашты.

Ф.Әхмәтов симфоник поэма, симфония, фортепьяно һәм оркестр өчен концертлар, шулай ук кыллы квартетлар һәм камера музыка кораллары өчен әсәрләр, 130 дан артык җыр һәм романс, моннан тыш драма спектакльләренә музыка иҗат итә. Татар музыка сәнгатенә керткән өлеше һәм казанышлары өчен композитор 1975 елда Россиянең М.И.Глинка, ә 1988 елда аңа Татарстанның Г.Тукай исемендәге дәүләт бүләкләренә ия була.

1952 елда Казан музыка училищесына Кукмара районы Салтык Ерыклы авылыннан17 яшьлек егет килә. Беренче көннәрдән үк биредә укытучылар аның талантын күреп ала.  Училищеда ул баянда оста уйнаучы буларак таныла һәм  шуны  исәпкә алып, Фасилны баян классына укырга алалар. Баянда уйнау серләрен тулырак өйрәнү белән бергә, ул композиторлык эшенә дә алына. Аның бу омтылышын күреп, укытучылары да ярдәмгә килә. Шулай итеп, берсеннән-берсе матур һәм кабатланмас музыка әсәрләре туа.

1998 елның көзе. Бу ел Фасил Әхмәтовны безнең арабыздан мәңгегә алып китте. Әмма композитрның әсәрләре халык күңелендә бүген дә яши һәм популярлыгын югалтмый.